काठमाण्डौः नेपाली सेनाको क्षमता अभिवृद्धि र व्यावसायीकरणका विषयमा अमेरिकी सेनाले सहकार्य गर्ने भएको छ । सहकार्यका लागि छलफल गर्न अमेरिकी सेनाको ‘युएस आर्मी प्यासिफिक’ अन्तर्गतका २० सैनिक अधिकारी काठमाडौं आएका छन् ।
नेपाली सेनालाई प्राविधिक हिसाबले सक्षम बनाउने विषयमा छलफल केन्द्रित हुनेछ । उपरथी नेतृत्वमा इन्डो प्यासिफिक कमाण्ड अन्तर्गतको युएस आर्मी टोली नेपाल भ्रमणमा आएको हो । दुई मुलुकका सैनिक अधिकारीबीच हुने यो छलफललाई ‘ल्याण्ड फोर्स टक’ नाम दिइएको छ ।
जंगी अड्डामा मंगलबारबाट दुई दिनसम्म नेपाली र अमेरिकी सैनिक अधिकारीबीच छलफल हुनेछ । शान्ति सेना, नेपाली सेनाको क्षमता अभिवृद्धि, विपत् व्यवस्थापन लगायतका विषयमा छलफल केन्द्रित हुने सैनिक स्रोतले बताएको छ।
प्रतिआतंकवादको विषयमा समेत छलफल हुने ति सैनिक अधिकारीले बताए । शहरी विद्रोह नियन्त्रण र प्रतिकारका विषयमा समेत दुई मुलुकका सैनिक अधिकारीबीच छलफल हुनेछ। नेपाली सेना र अमेरिकी सेनाले गर्दै आएको सैनिक कारवाही (मिलेटरी अप्रेसन) का विषयका बारेमा अनुभव आदन प्रदान हुनेछ।
अमेरिकी सेनाले नेपाली सेनालाई गर्दै आएको सहयोगका बारेमा समेत छलफल हुनेछ । अघिल्लो वर्ष जेठ २३ बाट दुई दिनसम्म पहिलो पटक ल्याण्ड फोर्स टक सञ्चालन भएको थियो । अहिले हुन लागेको त्यसको दोस्रो संस्करण हो । रक्षा प्रवक्ता सन्तबहादुर सुनारले अमेरिकी र नेपाली सैनिक अधिकारीबीच शान्ति सेना, नेपाली सेनाको क्षमता अभिवृद्धि लगायतका विषयमा छलफल हुने बताए । यो खबर अन्नपूर्ण पोस्ट दैनिकले प्रकाशित गरेको छ।
